PANTUN KERINCI (II)

Jilo mujilo pantun mumantun

Ubat hati lamung gilo

Bupantun pangubat dihi
Kalu dituhut tibao gilo

Semantuh tumbuh tepi imbo
Idak di luhah nyu tumbuh ugo
Bapantuh melestari kan budayo
Idak kito sapo agi ngan nak muo

Gunung tujuh ladi Kayu Aro
Dekat la dingan Gunung Kurinci
Kalu dak jadi ngan badan kayo
Bia ku tinggan tanah kurinci

Kalu la iyo si bna padi

Apo tando si padi payo

Kalu iyo iko nak si bena jadi

Bia kami tantek ngan si badan kayo

Kalu agi cabe bubungo

Idak kami ka salang puang
Kalu agi kami buguno
Idak badan tibuang jauh

Ku pelak tanam kuladi
Ado burisi duo ngan tigo
Maksud hati iyo nak jadi
Takut nyo kayo hati munduo

Kalu ado cabe bubungo
Iluk di tanam si cabe padi
Badan nyo kayo memang buguno
Kayo tu nian mumbuang diri

Kalu ku tau baju tu cabik

Idak ku pakai ka badan

Kalu tau iko munantik

Akan ku serah nyawo ngan badan

Pandai nian kayo munjalo
Tiap munjalo panjang nian tali
Pandai nian kayo bukato
Tiap bukato keno nian di hati

Bukan kami pandai munyalo
Ikan mati muminum tubo
Bukan kami pandai bu kato
Hati ti mabuk si badan kayo

Iluk bularik buluh purindu
Di pakai uhang jadi ku suling
Siang ngan malam di mabuk rindu
Kayo ku rindu lah duduk busanding

Bukak imbo di Ranah Sako

Situlah tempat butanam kopi

Kami lah tau rahasio iko

Manih di mulut lain di hati

Bukak imbo di Renah Sako
Uhang munanam punanam mudo
Jangan kayo salah munyangko
Idak pucayo belah lah dado

Muko di tegah kayo jalan ku Kinci
Jalan nyu buruk ba lubang lubang
Jangan lah kayo ninggan ku Kinci
Agi banyak uhang dingan sayang

Bu pelak bu tanam kacang

Kacang di tanam di Tanah Tinggi

Kalu ado uhang ngan sayang

Idak kami muracun hati

Sungguh tinggi gunung berapi
Situ lah nampak danau  Kincai
Kalo yo nian datung kito sihati
Langit takunci samo di ungkai

Ka mudek Gunung Kurinci

Ku ile ka Gunung Rayo

Kalu iyo dak sampai jadi

Ngaku dunsanak kito buduo

Dahi Pasise ndak ka Padang Aro
Kamai sikula di Padang Panjang
Kalo sampat idak jadi kito buduo
Rasokan remuk tulang belulang